Amit Shah-a'n tuilian vanga buai Assam ṭanpui a tiam

Union home minister Amit Shah chuan tuilian vanga buaina tawk mek, Assam chu an thlahthlam dawn lo tih sawiin, sorkar laipui chuan a theihna zawnah a thlawp reng dawn tih a sawi.

Amit Shah chuan Assam chief minister Himanta Biswa Sarman nen state chhunga harsatna thleng mek chu an sawi dun tih a tarlang a, National Disaster Response Force (NDRF) leh State Disaster Response Force (SDRF) te chuan rim takin chhan chhuah hna an thawk reng tih a sawi bawk. Shah chuan,"Prime minister Narendra Modi chu Assam mipuite tan a ding reng a, state in hun harsa tak a tawh lai hian ṭanpui a inpeih reng a ni" a ti.

Hetih lai hian hmarchhak tlawha zin, Congress party hruaitu Rahul Gandhi chuan Assam tuilian tuarte hi nimin khan a tlawh a, Fulertal-a chhawmdawlna-in tlawhin tuilian vanga chenna hmun chhuahsante chu a hmu a ni. Leader of Opposition a nih hnua hmarchhak a tlawhna hmasa ber niin tuilian vanga harsatna tawkte a tawrhpui thu a sawi. Rahul Gandhi hi Assam Congress hruaitute chuan tuilian leh a nghawng chungchangte an sawipui a, an hotupa hian parliament-ah an tuarna hi sawi chhuak se an duh tih an hrilh bawk.

Assam-ah hian tuilian vanga thi pariat an awm belh leh tawh a, tihian an zavaiin nunna chan mi 78 an awm tling tawh a ni. Assam chhunga district 30 chu tuilian vang hian la buai mekin mi mtd 2.42 a nghawng a ni. Kaziranga National Park pawh tuilian vang hian harsatna tawkin ramsa 129 an thi tawh niin park thuneitute chuan an tarlang.