Nagaland : ENPO-in Eastern Nagaland-a public emergency titawp

Eastern Nagaland Peoples' Organization (ENPO) chuan Frontier Nagaland Territory (FNT) an ngiatna tih lanna atana kumin February thla aṭanga Nagaland khaw chhak lama public emergency an puan chu an titawp lailawk tih an puang.

ENPO headquaters-a July 3, 2024 a meeting an neih ṭumin he thutlukna hi an siam a ni. ENPO chuan FNT an ngiatna kawnga inhriatthiam tawnna a awm theih nan leh ralmuang zawka an thilphut tihhlawhtlin an nih theih nan public emergency hi an hlip tih an tarlang. Hetihrual hian an dinhmun a zirin public emergency hi huaihawt leh thei reng a ni tih an tarlang bawk.

Urban Local Bodies (ULB) inthlana Eastern Nagaland lama candidate an awm mumal loh chhan ENPO chuan a sawifiah bawk. ENPO chuan Eastern Nagaland mipuite chuan ULB inthlanah hian tel an duh loh tih sawiin, hemi a nih avang hian helai huamchhung aṭang hian candidate pawh an nei ta lo tih an sawi.