NDFB-te pawi khawih chungchangah Thubuai 102 ziah luh a ni : Tarun Gogoi

Assam chief minister Tarun Gogoi chuan National Democratic Front of Boroland (NDFB) ten pawi an khawih chungchangah thubuai 102 ziah luh a nih tawh thu a sawi.

Tarun Gogoi sawi danin, thubuai 102 an ziah luh hi NDFB te pawi khawihna avanga mi 81 an thihna leh mi nuai 2 chuang chenna in nei loa an awm kaihhnawihah a ni. National Investigating Ageny (NIA) pawhin Assam-a buaina chhuak chungchang hi an chhui ṭan tawh a ni.

Assam Chief Minister chuan buaina chhuak avang hian mi 58 man an nih tawh thu sawiin, "NIA chhui turin thubuai pali chu an kutah kan hlan tawh. Thubuai dang pawh NIA chhui turin kan la pe zel ang," a ti.

NDFB ten buaina an siam avanga mithi chu mi 81 an tlin tawh thu sawiin Tarun Gogoi chuan, "Buaina chhuahna hmunah mi pathum an la bo mek," a ti a, security force-te'n buaina chhuah chhana mawhphurtu man chhuak turin an theihtawp an chhuah reng thu a sawi.

National Democratic Front of Bodoland (NDFB) te hian remna atana inbiakna duh loin December 23, 2014 khan Kokrajhar, Chirang and Sonitpur district an bei a, mi 81 in nunna an chan phah bakah, mi nuai 2 vel chenna in nei loin an awm. Buaina chhuah leh hlauhthawn thilah mi engemawzat chu relief camp-ah dah luih an ni.

Tarun Gogoi chuan January 3, 2015 khan boruak a ziaawm tawh thu sawiin, "Buaina chhuahna hmunah hian police engemawzat kan dah a, mipuite an him ngei ang. Mi nuai 2.9 relief camps 136 an awm ṭhin a, tunah chuan relief camp 102 ah mi nuai 1.82 chiah an awm tawh a ni," a ti.