Corruption kan do zel ang : Assam CM

Assam police anti-corruption wing chuan Thawhlehni khan Guwahati-a DFO Mahat Chandra Talukdar chenna inah pawisa fai ṭhahnem tak man a ni a, a kawltu Talukdar pawh an man ve nghal. Pawisa fai an man hi cheng vaibelchhe hnih chuang a ni a, pawisa bakah hian thil hlu dang a kawl - rangkachak tlereuh, cheng nuai tam tak hu leh ramsa vun eng emaw zat an man tel bawk. Talukdar hi thamna sum la leh, a sum lakluh phu loa hausaa puhna thubuai siamsak a ni.

Hemi chungchangah hian Chief Minister Sarbananda Sonowal chuan thil dik lo titu chu hrem ngei a ni ang tiin, corrupt kaihhnawih reng reng chu chhuizui zel a nih tur thu a sawi. Mipuiten sorkar-ah rinna an nghah tlat avangin sorkar chu dik taka a kal a ngai a ni a ti a, eirukna a ni emaw thil dik lo a awm emaw a nih chuan chhuizui zel a ni dawn tih a sawi.

CM Sonowal chuan state sorkar chuan nasa takin corruption umbo turin hma a la mek a, corruption do nan hian ‘zero tolerance’ policy kalpui a ni dawn tih sawin, BJP sorkar chuan Lokayukta leh Vision Document te chu Gauhati High Court judge hlui kaihhruainain a kalpui dawn a ni, a ti bawk.

Hetih lai hian CM chuan National Register of Citizens (NRC) kalpui mekah thubuai ziahluh a ni tawh tih sawiin, heng zinga a tam zawk chu document lem hmanga NRC-a hming ziahluh tum an ni, a ti. He mi chungchangah hian Deputy Commissioner te leh Superintendents of Police te nen meeting an neih tawh thu leh,NRC chu dik taka kalpui turin an in chah thu a sawi. NRC official Hajela chuan, document an dawn tawh zawng zawng aṭanga 64% chu endik a nih tawh thu sawiin, endik hna hi fimkhur taka kalpui a ni a, ni khatah document 30,000 vel endik ṭhin a nih thu a sawi. Deputy Commissioner leh Chief Minister thurawn angin chak zawka kalpui tura hma lak mek a nih thu a sawi.

Sonowal chuan Indo-Bangla border venhimna khauh zawka kalpui a nih theih nan Assam-ah sluice gate leh airship siam a ni dawn a, nakum June-a zawh hman tura ruahman a ni, a ti. Ramriah hian high-resolution camera dah a ni dawn a, dan loa ṭhenawm ram Bangladesh aṭanga lutru leh ruihhlo tawlhruk te venna atana tih a ni.

BSF Director General K K Sharma, Additional DG A P Maheshwari leh Assam CM Sarbananda Sonowal te chuan tun hnai khan ramri hi tlawhin, venhimna khauh zawka kalpui dan tur an ngaihtuah. Union Home Minister Rajnath Singh chuan ramri chungchangah hian kar kalta khan high-level meeting Delhi-ah a lo ko tawh bawk a ni. Sonowal chuan Assam-ah hian BJP sorkar a ding a nih chuan ramri venhim chu an ngaih pawimawh ber tur zinga mi a nih thu a lo sawi tawh bawk.