Manipur-ah kawng dang chhunzawm zel

Manipur-a pawl hrang hrang ten chakkhai an lakluhna kawngpui an dan chu an chhunzawm zel avangin nunphung a tibuai tawh hle a, NH-37-ah chuan lirthei eng emaw zat a tangkhang mek.

Joint Action Committee Against Anti-Tribal Bills (JAC) Churachandpur leh Outer Manipur Tribal Forum (OMTF) te bultuma lungawi lohna lantira kawngpui dan hian ni 10 a awh dawn a, vawiin hi a ni sarihna chiah a ni. Tarlan a nih dan chuan, Tamenglong district-a Namdoujang khuaah Mini-truck MN05C-2228 chu hal a ni a, boruak a ṭha lo hle. Mini-truck hi Imphal
aṭanga Jiribam pana tlan a ni. Lirthei neitu Wahengbam Nganthoiba (35) Imphal ami chuan police station-ah FIR a thehlut nghal a ni.

June 10 zan lai aṭang khan Economic blockade hi neih ṭan a ni a, Imphal-Dimapur NH-2 leh Imphal-Jiribam NH-37-ah te chuan lirthei bungraw phur za chuang an tangkhang mek a, Mao Gate-ah pawh truck 55 vel an tang mek bawk. Truck tangkhang zingah hian oil tanker eng emaw zat telin, heng te hi police leh security force te venna hnuaiah Imphal pan pui an ni. CRPF te pawhin puiinn Ningani zan khan heng tanker te hi Imphal thlenpui an ni. Oil indaih lohna hi a nasa tawh hle a, pump tam tak chuan hralh chhuah tur an neih tawh lo.

JAC leh OMTF ten national highway an dan chhan hi nikuma Manipur Assembly-in anti-bill pathum a pass vang a ni. JAC kaihhruaina hnuaiah Thawhlehni khan meeting neih a ni a, hma lak zel dan tur an rel bakah bill duh lohna lantira Churachandpur district-a buaina chhuaka nunna chan ta mi pakua te ruang tun thlenga Churachandpur district hospital-a dah mek chungchang te an sawiho a ni. Heng martar chhungte
ṭheuh bakah tribal chief, tribe council hruaitu te leh JAC ai awh te chuan heng mite dikna haichhuak tur hian Delhi pan an remti bawk. Meeting chuan Manipur tribal movement kalpui turin ruahmanna an siam nghal a, a ṭul a nih chuan ni 300 awh tur lungawilohna lantirna an huaihawt leh tur thu an sawi bawk.