Court-ah Sharmila inlan

Manipur-a sipai thuneihna sang pekna, Armed Forces Special Powers Act (AFSPA) duh lohna lantirtu, Irom Chanu Sharmila chu Thawhlehni khan Imphal Chief Judicial Magistrate hmaah inlanin, Section 309 IPC (attempting to commit suicide) hmanga mahni intihhlum tuma puhna chu a dik lo tih a sawi.

Chief Judicial Magistrate hmaah hian Sharmila chuan,"India khua leh tui ka nih angin dikna hai chhuah nan ka dikna ka hmang chhuak ve mai a ni. Manipur-a AFSPA hman mek hi hlih a nih hma loh chuan ka bei zel dawn a ni", a ti bawk. Sharmila hi Magistrate hmaa inlan tur hian JNIMS hospital aṭangin hruai chhuah a ni a, hun rei tak chhung chu he hmunah hian enkawl a ni tawh a, a hnar aṭangin eitur pek a ni a, state sorkar chuan a inenkawlna hi a tum sak. Sharmila lakah hian Cril (P) hnuaiah Section 251 CrPC case number 28 of 2016 (FIR No 31 (3) 2016) Section 309 IPC (attempting to commit suicide) hmangin City police station-ah thubuai ziah luh a ni. Court chuan Sharmila hi AFSPA hlih a nih theih nana chaw ngheia a nawrhna chu mahni intihhlum tumna a ni lo tih a pawm a ni.

Sharmila chuan, "Court-ah hian Section 309 hmanga mahni intihhlum tuma puh ka nih avangin ka dikna te ka sawi chhuak a, court chuan mahni intihhlum tum ka ni lo tih a pawm a ni", a ti. Sharmila hi Patiala House Court, New Delhi pawhin hethubuaiah vek hian thiam a lo chantir tawh bawk. Manipur Iron Lady an tih mai Irom Chanu Sharmila chuan, "Tunah chuan Manipur hmun ṭhenkhata AFSPA hman mek chu hlip turin kawng a inhawng ṭan ta a ni, kei leh mipuite chuan hnehna kan chang thuai dawn e", tiin thuthar thehdarhtute hmaah a sawi.