Hmarchhak thingtlang khaw 88-ah eng pek a ni tawh

Sorkar laipuiin India rama eng la thlen lohna thingtlang khuaah eng pek a nih theih nana a kalpui mek Deen Dayal Upadhyaya Gram Jyoti Yojna (DDUGJY) hnuaiah hmarchhak state-a thingtlang khaw 88-ah eng hi pek a ni tawh.

June 6-12 chhung khan Meghalaya-a thingtlang khaw parukah eng hi pek thar leh a ni a, hemi chhung vek hian India rama eng la luh lohna thingtlang khaw 141-ah eng hi pek a ni ve bawk. Hmarchhaka eng pek thar te chu Manipur (2), Arunachal Pradesh (4), Meghalaya (6) leh Assam (76) te an ni a, heng bakah hian state dang Jharkhand (28), Rajasthan (2), Madhya Pradesh (9), Odisha (6), Uttar Pradesh (1), Bihar (10) leh Chhattisgarh (3) ah te eng hi pek a ni.

Prime Minister Narendra Modi chuan nikuma Independence Day lawmnaa thu a sawinaah India ramah eng la luh lohna thingtlang khua 18,452 zet a awm tih sawiin, heng khuaah te hian ni 1000 chhungin eng pek vek a nih tur thu a lo sawi tawh a ni. Kum 2018, May-ah chuan eng la pek lohna khua zawng zawngah hian Deen Dayal Upadhyaya Gram Jyoti Yojna (DDUGJY) hnuaiah eng hi pe vek hman tura ruahman a ni. He project hi kalpui mek a ni a, khaw 8,242-ah eng hi pek tawh niin, khaw 10,210 pek ngai a la awm a ni.

Kum 2015, April aṭanga 14th August, 2015 chhung khan khaw 1654-ah eng hi pek hman a ni a, 15th August 2015 - 12th June,2016 khan khaw 6,588-ah eng hi pek leh a ni bawk.