Inthahna thleng chungchangah Sorkar thu a inkalh - Mahanta

Assam Former Chief Minister leh AGP leader Prafulla Kumar Mahanta chuan state sorkarin, kar kalta a Sonitpur a BTAD in mi 30 chuang an thahnaah thuneitute thu inkalhin, mipuite tih chiai an tum a ni, a ti.

IGP Sn Singh chuan NDFB(S) hruaitu IK Songbijit chu he inthahna­ah hian a inhnamhnawih ve loh thu sawiin, a hnu lawkah Chief Minister Tarun Gogoi chuan Songbijit hi chiang taka a tel ve thu a sawi thung tih Mahanta chuan a ti.

"Thu inkalh tak Chief Minister leh senior police officer in an sawi hi hriatthiam har ka ti a. State sorkar hian a mawhphurhna a ni tih hriain Assam mipuite hnenah hian thudik chu sawi rawh se," a ti. Tu emaw zawk chuan dawt a sawi ngei tih a chiang hle. An thusawi inkalh avang hian investigation kalpui turah nghawng neiin, thu belhchian dawl loah mipuite an innghah a ṭul phah thei a ni, a ti.

Mahanta chuan, "Assam Commissioner leh Secretary(Home) Prateek Hajela sawi danin hetiang buaina chhui kawnga chak zawka hmalak a nih theih nan India sorkar­in kum 1996 khan thuchhuah siamin, Chief Secretary of Assam chairman-na hnuaiah Strategy Group an din a ni" a ti bawk.

Sonitpur buainaah khan naupang kum 7 mi Talla Tudu chu silaiin a taksa hmun sarihah kah a nia, damdawi in a enkawl mek niin a damchhuah ngei doctor ten an beisei. Talla Tudu hian a nu chan tawhin, a nu hi damdawi in panpui a nih laiin a hliam tuar loin a thi a ni.

NDFB rawng taka an chetdan duhloh lantirna Adivasis ho neihnaah police in mipui hnawhdarh an tumna lamah silai hmetpuakin kum 22 mi Bikash Tigga chuan a ke ah hliampui a tuar a, a ke chan mai thei dinhmunah a din thu doctor ten an sawi. Tigga hi zirlai niin a chhungte chawmnan Sohitpur District thingpui huanah hna a thawk ṭhin a ni.