AP-ah Zonal Hospital din a ni dawn : Kalikho Pul

Arunachal Pradesh Chief Minister Kalikho Pul chuan health sector lamah nasa taka hma lak a nih tur thu sawiin, kumin chhung ngei hian zonal hospital eng emaw zat din tum a ni tiin, hemi atan hian hnathawktu 2,000 lak a ni ang, a ti bawk.

"Arunachal Pradesh sorkar chuan nasa takin zonal hospital din tur hian hma a la mek a, hengte hi medical instrument changkang tak tak hmanga thuam a ni dawn a, damlo te chu specialist doctor ten an vil dawn a ni" Chief Minister chuan a ti.

CM Pul hian tunhnai khan Delhi panin an state-a hmasawnna hnathawh hrang hrang te union minister-te a sawipui bakah, an state hmachhawp leh mamawh te a thlen a ni. Kum 46 na hmang mek CM chuan health sector-ah an hnufual hle tih an pawm a ṭul a, hemi sukiang tur hian theihtawp an chhuah dawn tih a sawi. Dam lo mangang tak tak ten damna duhin Guwahati leh Delhi te an pan
ṭhin a, he mi titawp tur hian state chhungah a tam thei ang ber zonal hospital tumin hmalak mek a ni a ti.. Zonal hospital hi Bomdila, Ziro, Pasighat leh Khonsa-ah te din a ni ang.

Ziro-ah hian Zonal hospital din a nih chuan Kurumkumey, Subhansiri, Lower Subhansiri leh a chheh vela mite chuan ṭangkai takin an chhawr thei dawn a, hmun danga mite pawhin an ṭangkaipui hle dawn a ni. Pul chuan sorkar hmasain Public Health Centres (PHC) a din te chuan mipui mamawh a phuhruk zo lo tih sawiin, hmanrua leh hnathawktu an indaih loh avangin mipuite harsatna a sukiang tak tak lo a ni, a ti. Heng PHC te hi NGOs te kutah hlan a nih tawh thu sawiin, an ni hian a enkawl hna pawh an thawk a ni, a ti.

Chief Minister chuan tunah hian state sorkar chuan health department-a thawk tur super specialist doctor, nurse, laboratory technician, peon leh ambulance driver tur mi 2,541 lak a remti tawh tih a sawi bawk. Heng hna lak tur te hi kumin chhung ngeia tihfel a ni tur thu sawiin, hemi atan hian sorkar chuan thla tinin cheng vaibelchhe 8 a sen belh dawn tih a sawi bawk.

Andhra Pradesh hi India rama state zau ber zinga mi ni mah se, a mi cheng hikum kalta khan maktaduai 1.3 vel chauh an tling. Hriselna lam dinhmun a ṭha tawk lo hle a, infant mortality (kum tlin hmaa nausen thi) rate leh fertility rate a sang a, nu valai zinga 30% vel chu an mamawh ang ei tur
ṭha ei loh vangin an hriselna a ṭha tawk lo a ni.

Kalikho Pul chuan, dan leh thu pek kenkawh chungchang sawi langin, police ṭhahnem tak lak belh turin hma lak mek a nih thu te, mipuite himna chu ngaih pawimawh a ṭul nih thute a sawi. Police 2,664 lak belh tum mek a ni a, heng zingah hian hmeichhia pawh eng emaw zat lak a ni ang a ti. Hmeichhe police lakna hi district tinah kalpui a nih tur thu chief minister chuan a sawi bawk.