JCILPS ten Manipur sorkar-ah ngenna thlen

India President-in 'Protection of Manipur Peoples’ (PMP) Bill 2015' a hnawl hnuah Joint Committee on Inner Line Permit System (JCILPS) te chuan state sorkar-ah ngenna thlenin, he bill hi July-a Manipur Legislative Assembly Session neih leh turah ennawn a, pass ṭha leh turin an phut.

JCILPS hruaitu BK Moirangcha chuan, "Protection of Manipur Peoples’ (PMP) Bill 2015 hi ennawn a, siam ṭha tur leh hman a nih thuai theih nana hma la turin state sorkar kan ngen a ni. Manipur Land Re-venue and Land Reforms (7th Amendment) Bill 2015 leh Manipur Shops and Establishments (2nd Amendment) Bill 2015 te pawh siamṭhat ngai a awm a nih chuan siam
ṭhat thuai ni rawh se. Heng Bill pathum te hi hman a nih thuai theih nan BJP Manipur Pradesh chu hma la turin kan phut bawk a ni" a ti. JCILPS te chuan Inner Line Permit System chu hmarchhak hmun ṭhenkhatah hman mek a nih thu sawiin, hman ve an duh thu an tarlang bawk.

JCILPS te chuan state sorkar-a ngenna an thlen te state sorkar-in a ngaihthah a nih chuan nasa zawka lungawi lohna lantir leh an tum thu sawiin, sorkar chu an ngenna ngai pawimawh turin an phut. Hetih lai hian JCILPS te chuan sit-in-protest leh public demonstration an kalpui mek chu chhunzawm zel an tum thu an sawi a ni.

Manipur-a Tribal te chenna bial hmun hrang hrangah JCILPS te hmalakna hian Natioanal Highway dan chah mek a ni a, hmun tam takah mipui khawsak phung a buai phah hle. Kawngpui dan a nih avang hian bungraw phur lirthei eng emaw zat chu an tangkhang mek a, mipui mamawhna a san avangin oil phur Truck-te chu venhimna hnuaiah Imphal hruai thlen an ni tawh a, eng emaw zat chu an la tangkhang mek bawk. Thil man a san chhoh zel avangin mi tam takin harsatna an tawk mek a ni. June 9 zan lai
aṭang khan kawngpui hi dan ṭan a ni a, June 19 thleng a awh ang.