Hmarchhak mite enhranna dan bawhchhiatna ni dawn

Chi inthliarna lam hawia hmarchhak mite enhranna leh hmuhsitna chu sorkar laipuiin tihtawp tumin Indian Penal Code (IPC)-ah a hremna tur section dahbelh a tum.

Union Home Minister Rajnath Singh chuan he thu hi sawiin, hmar­chhak mite himna atana Bezbaruah Committee-in rawtna a thlente chu sorkar laipuiin a pawm thu leh IPC-ah section 153C leh 509A belh a nih tur thu a sawi.

"Indian Penal Code chu section thar, 153C leh 509A dahbelh nan siamṭhat a ni dawn a, hei hi Law ministry pawhin a pawmpui tawh a ni. Sorkar laipui chuan India ram hmun hrang hranga hmarchhak mite himna hi a ngaipawimawh a ni," tiin Union Home Minister Singh chuan a sawi.

January 2014 khan Aru­na­chal Pradesh zirlai, Nido Tania chu chi inthliarna thil vangin Delhi-ah thah a ni a, hmarchhak mite'n nasa taka lungawi lohna an lantir hnuah sorkar laipui chuan February, 2014 khan hmar­chhak mite himna zirchiang a, rawt­na ngaihtuah turin M.P Bezbaruah kaihhruaina hnuaiah committee a din a ni. Sorkar laipui chuan January 3 khan committee rawtna thlente hi pawmin, a takin a kalpui ṭan a ni.

Home Minister Rajnath Singh chuan chi inthliarna lam hawia hmarchhak mi tharum thawhna tuarte hnenah Delhi sorkar chuan Delhi Victim Compensation Scheme 2011 tlawh­chhanin zângnadawmna a pek tur thu a sawi bawk. Delhi-ah hian hmarchhak mi nuai hnih chuang an cheng a ni.

Development of northeastern region (DoNER) ministry official chuan Delhi-a hmarchhak mi 86% chuan chi intliarna lam hawia tihduhdah an tawh thu a sawi a, ṭawngkam mawi lo taka chhaih nawmnah emaw mi kut tuar te pawh an awm thu a sawi bawk.