Forbes List-ah Manipur hmeichhia a lang

Silai hmanga tharum thawhna tuartute tana beitu, Binalakshmi Nepram chu Forbes magazine-in kum 2015 atana “Minds That Matter” list a buatsaihah a telh.

Nepram-i hi tlawmngai pawl, Manipur Women Gun Survivors Network, CAFI leh North East India Women Initiative for Peace dintu a ni a, Manipur hmeichhiate dinhmun siamṭhatna atana theihtawp chhuaha beitu a ni.

Forbes India magazine-in January 9, 2015 issue a tih­chhuahah Nepram-i chu India ram danglamna tura sualtu a ni, a ti a, hmarchhak mite'n chi inthliarna lam hawia tihduhdah an tawrhna dodaltu leh hmarchhak mite dikna chanvo sualtu a ni, a ti.

Kum 2014 khan Nepram-i leh hmarchhak mite chuan New Delhi-ah hmarchhak mite thliar hranna duh loh vanga lungawi lohna lantirin ṭum eng maw zat nawrh an lo huaihawt tawh a, hmar­chhak mite himna chungchang ngaihtuah tura din, Bezbaruah committee din a nih theih nan mi pawimawh tak pakhat a ni.

Nepram-i hi Forbes List-a hmarchhak mi lang awm chhun a ni.

Nepram hian a kutchhuak lekhabu pathum a chhuah tawh a, kum 2003 khan Manipur hmeichhia tharum thawhna tuartute tan nasa takin a lo bei tawh bawk. United Nations hnuaia hmeichhia te dinhmun chawikanna atana meeting-ah ṭum eng emaw zat India ai a lo awh tawh bawk.

Dalai Lama Foundation’s chawimawina a dawn tawh bakah WISCOMP Scholar of Peace Award, Sean MacBride Peace Prize leh CNN IBN Real Heroes Award a dawng tawh bawk. Kum 2013 khan London-a pawl pakhat, Action on Armed Violence chuan “100 most influential people in world working on armed violence reduction” ah a lo telh tawh bawk a ni.