Guwahati-in Saarc Games a thleng dawn

Guwahati chuan South Asian Association for Regional Cooperation (Saarc) Games leh Himalayan Region Sports a thleng dawn.

He thu hi Union Sports Minister Sarbananda Sonowal chuan sawiin Saarc Games-ah hian Saarc ramte an tel tur thu leh Himalayan Region Sports-ah hian rampawn aṭangin Nepal leh Bhutan an tel ang a, hmarchhak state pariat bakah Jammu & Kashmir, Uttarakhand leh Himachal Pradesh te an tel dawn tih a sawi.

Sonowal chuan intihsiakna buatsaih turin theihtawp chhuaha sorkar laipuiin a ṭanpui tur thu a sawi a, mahse sports neih hun tur erawh a sawi lang lo.

Guwahati chuan January 8 aṭanga 12 chhung hian National Youth Festival a thleng dawn bawk a, festival-ah hian India rama infiamna lama hmingṭha, Virender Sehwag, Mary Kom, Sushil Kumar leh midangte pawh an tel rin a ni.

Union Sports Minister Sonowal chuan Youth Festival chung­chang hi sawiin, palai 3,000 chuang an tel a beisei thu a sawi a, palai zingah hian ram 10 aṭanga India rama lehkha zira awmte pawh an tel tur thu leh Delhi University, Jawaharlal Nehru University, IIM leh IIT zirlaite pawh an tel tur thu a sawi bawk.

Sonowal chuan union human resource development (HRD) ministry chu school curriculum-a sport activities bika zirlaite mark pek dan tur pawh ennawn tura a ngen thu a sawi a, sports ministry chuan India rama khaw nuai ruk-ah sport infrastructure din an tum thu a sawi bawk.

"India rama block 7,000 huamchhunga khaw nuai ruk-ah indoor leh outdoor stadium sak a ni dawn a, hemi atan hian state sorkar te chu ram ngaihtuah turin an hriattir tawh a ni. Sorkar laipui chuan stadium pakhat sak nan cheng vaibelchhe 1.6 ṭheuh a sêng dawn a ni," a ti.

Sport minister chuan hmar­chhak bialah football zirna leh thal kah zirna hawn a nih tur thu a sawi bawk a, India ramah sports medicine leh sports science zirna neih a pawimawh thu a sawi bawk.