Tripura-ah CCTNS siam a ni

India rampuma pawikhawihna chhuina atana ruahman, Crime and Criminal Tracking Network System (CCTNS) chu Tripura-ah siam a ni tih state police hotuin Thawhṭanni khan a sawi.

CCTNS project hi Union Home Ministry chuan kum 2009 khan a kalpui ṭan a, software application pakhat niin, internet hmanga pawikhawihtu chhui theihna tur a ni.

Director General of Tripura Police K Nagaraj chuan he thu hi sawiin, Tripura-a police station zawng zawng chu CCTNS project hnuaiah internet hmanga thlunzawm vek a ni, a ti.

Tripura-ah hian police station 72 a awm a, heng zingah hian hmeichhe thubuai ngaihtuah tur bik, women police station pali a tel.

Nagaraj chuan Bharat Sanchar Nigam Limited (BSNL)-in internet connection an tihfel hnuah CCTNS chu hman ṭan theih an beisei thu a sawi a, hmun kilkhawra internet connection thlen lohna hmunah VSAT (very small aperture terminal) hmangin CCTNS hman a nih tur thu a sawi bawk.

CCTNS project hnuaiah sorkar laipui chuan India rama police station 14,000 bakah police te kaihhnawih office 6,000 chuang internet hmanga thlunzawm nan cheng vaibelchhe 2,000 a ruahman a ni.