Rahul-a'n Manipur tlawh turin PM Modi a phût

Congress hruaitu leh Leader of Oppposition ni bawk, Rahul Gandhi chuan prime minister Narendra Modi chu chi leh chi inkara buaina vanga tualchhung indo chhuahna hmun, Manipur chu tlawh ve se a duh tih a sawi. Rahul Gandhi hian Thawhṭanni khan tuilian leh tualchhung buaina avanga harsatna thlenna, hmarchhak state pahnih- Assam leh Mnaipur te a tlawh a ni.

Imphal-a thuthar thehdarhtute nen an inkawmnaah Gandhi chuan PM chu Manipur a kal tura a duh thu sawiin, a hmun ngeia thil thlen dan hrechiang turin tlawh se a duh tih a sawi. "Mipuite tawrhna hi hmuin hrethiam ve se ka duh a ni" a ti. India rampumin PM Modi chu Manipur-a kal tura an duh thu sawiin chutiang a tih chuan mipuiten a chungah rinna an nghah ngam phah dawn a ni, a ti bawk.

Congress hruaitu chuan,"Manipur hi ka vawithum tlawhna a ni ta a, thil a ṭha lama zawnga a kal ka beisei laiin hmasawnna engmah ka hmu lo a ni" a ti. Gandhi hian Manipur in remna an mamawh tih sawiin tualchhung buaina chuan chhungkaw tam tak a nghawng a, in leh lo tihchhiat niin nunna chan tam tak an awm bawk tih a sawi. State chhung mipuite chu ṭhenhran niin a tuartute chu mipuite bawk an ni, a ti. Manipur mipuite chu a thlawp tlat tur thu sawiin remna a awm theih nan hmalak a tiam a ni.

Chhawmdawlna-in Rahul-a'n a tlawh

Tun hnaia tualchhung buaina chhuah tharna hmun, Jiribam district-a chhawmdawlna-in chu Thawhṭanni khan Rahul Gandhi hian a tlawh. Rahul-a kal hma hian Phaiton khuaah helpawl leh security forces inkarah inkahna a chhuak nia tarlan ni mah se Gandhi hian Jiribam hi a tlawh ta tho a ni.

Jiribam Higher Secondary School, chhawmdawlna-in atana siam ni ta chu tlawhin helai hmuna chengte hian an harsatnate an lo hrilh a ni. Manipur Congress president Keisham Meghachandra chuan Jiribam mipuite chuan Gandhi hi an lo lawm hle tih sawiin khawlaiah amah hmuak turin mi tam tak an pung khawm niin a sawi.

Jiribam aṭang hian Churachandpur lam pan lehin, Tuibong khuaa chhawmdawlna-in chu Gandhi hian a tlawh leh a, helai hmuna awmte nen hian inkawmna hun an nei leh a ni. Meghachandra chuan Rahul Gandhi hian mipuite lama a ṭan zia tilang tur leh a hmun ngeia thil awmdan zirchiang turin Manipur a tlawh tih a sawi a, hei hian tualchhung buaina vanga mipuite tawrhna chu an party in chin fel an duhzia a tilang a ni, a ti bawk.