Nagaland : Kohima-ah phalna nei chauh Pathianniah dawr hawn phal

Kohima Municipal Council (KMC) chuan Pathiannia dawr hawng tura permit neite chauhin July 10 aṭangin dawr an hawng thei tawh dawn tiin thupek an chhuah. Kohima municipality huamchhungah hian ward pakhat aṭanga dawr hawn theih zat bituk a awm ang.

KMC administrator, T. Lanusenla Longkumer chuan Kohima deputy comissioner office-a an ṭhutkhawmnaah Pathiannia dawr hawn dan tur chungchang hi an rel tih sawiin, permit neite chauh hawn phalsak turin thutlukna an siam ta a ni. KMC chuan dawr hawn phalna hi March 6, 2021 a notification a lo tihchhuah tawh zulzuia pek tur a ni dawn a, he hriattirna hian ward khatah dawr 10 hawn phalsakin, dawr neituten ward chairman hnen aṭangin phalna an lak hmasak a ngai thung.

Dawr hawn theih loh hian dawmdawi lam zuar, hotel, chhang ur leh siamna hmun bakah lu mehna dawrte a huam tel lo a, heng dawr neitute hian phalna la hmasa loin dawr an hawng thei dawn thung a ni. KMC chuan phalna nei loa dawr hawng luite chungah hremna an lekkawh dawn tih tarlangin, an thil zawrhte chu mansak an ni dawn tih an sawi tel bawk.