Zirlaiten digital skills an neih theih nan Tripura sorkar leh NASSCOM thawk dun dawn

Tripura sorkar leh National Association of Software and Service Companies (NASSCOM) chuan Memorandum of Understanding ziakin state chhung zirlaiah digital thiamna lam zir tel a ni tawh dawn a ni.

Sorkar leh NASSCOM inremna hi NITI Aayog thlawpna hnuaia ziah niin zirlaite chu AI, ML, blockchain leh digital thiamna lam hawi zirtirna pek ṭhin an ni ang. NITI Aayog chuan he hmalakna hi 'Viksit Bharat 2047' a hlawhtlin nana ke penna pawimawh tak niin a sawi. Tripura ṭhalaite chu digital thiamnaa thuam tuma hmalakna niin digital khawvel ṭhangduang taka an tel ve theih nan a pawimawh a ni tih NITI Aayog chuan a tarlang bawk.

NASSCOM chuan thil inthlakthleng a awm dawn a ni tih sawiin, sorkar nena an MoU ziah chu zirlaia digital thiamna lam zir tel tura inremna a ni tiin Tripura ṭhalaite chu digital lama thiamna neihtir an tum tih an sawi. He hmalakna hi India ram tan pawha thil chenfakawm a nih ngei an beisei tih an tarlang tel bawk. Tripura education secretary, Raval Hamendra Kumar leh NASSCOM Strategy and Operations hotupa Dr Upmith Singh te chuan inremnaah hian an hming an ziak a ni.