Arunachal : Leimin vangin harsatna tawk

Arunachal Pradesh-ah ruah sur nasain a thlen, leimin vangin hmun hrang hrangah inkalpawhna kawng tlang lo a tam hle tih thuneitute chuan Thawhṭanni khan an tarlang.

Lohit leh Anjaw district-a Tezu-Hayuliang kawng chu leimin vang hian a tlang lo a, hemi bakah hian Kra Daadi district-a Dari-Chambang leh Palin-Taraklengdi kawngpui pawh a ping a ni. East Siang district-a NH 513 pawh a tlang lo nia tarlan a ni bawk. China ramria district pakhat, Kurung Kumey district chhunga khaw ṭhenkhat chu leimin vang hian tlawhpawh theih lohin a awm mek bawk.

Leimin vang hian Shi-Yomi district-ah Zirtawpni khan mi pakhat a thi a, April thla aṭanga chhiarin khuarel chhiatna vanga nunna chan hi mi pali an tling tawh a ni. Arunachal chhungah hian April thla aṭanga chhiarin leimin leh tuilian hi khaw 257 ten an tuar a, mi 72,900 chuang a nghawng a ni. Nunna chan an awm mai bakah kawngpui 160, electrict line 76, thir ban 30, transformer pathum, lei (bridge) pakua, Culvert 11 leh tui pek chhuahna 147 in a chhiat phah bawk a ni. State khawpui Itanagar-ah chuan tui pek chhuahna a chhiat vangin tui inturah harsatna an tawk mek a ni.