NDFB (S) hel pakua man an ni
December 23, 2014-a Assam-Arunachal Pradesh ramri, Kokrajhar leh Sonitpur district-a National Democratic Front of Boroland (Songbijit) helte'n mi tam tak an kahhlum kaihhnawiha security force te'n helpawlte laka beihpui an thlakah hel pakua an man tawh.
Hetihlai hian National Investigation Agency (NIA) Director General Sharad Kumar pawhin Assam tlawhin, hel pawlte chet dan chhuichianna a enpui a tum. Kumar hian nimin khan helho pawikhawih thlenna hmun a tlawh nghal bawk.
State Home Department thuchhuak chuan Sonitpur district leh Bodoland Territorial Area District—Kokrajhar, Chirang leh Udalguri district-a relief camp-a awm zat chu an tlahniam zel niin a tarlang a, pawikhawih hluarna hmunah khauh zawka venhimna kalpui chhunzawm zel a ni, a ti.
NDFB (S) helte hian December 23, 2014 khan hnam hnuaihnung, Adivasi te chenna khua beiin mi tam tak an kaphlum a, hei hi Adivasi mite chuan chhangletin, Bodo hnam chenna khua an beilet a, mi eng emaw zat an thih bakah thiltleng vanga lungawi lo nawrh huaihawtte leh police te innawrnaah police te chuang silai hmetpuakin, nunna chan an awm bawk a ni. Thilthlengah hian mi 83-in nunna an chan a, mi nuai 2.70 chuangin an chenna in an tlanchhiatsan bawk.
Assam State Disaster Management Authorities chuan Thawhlehnia thuchhuah a siamah district pali-a relief camp 77 an hawnah mi 1,29,828 an awm tih a tarlang.