Meghalaya Governor atan Tripathi lakluh a ni

West Bengal Governor Keshari Nath Tripathi chu Thawhlehni khan Meghalaya Governor hna chelhkawp tura lakluh a ni.

Governor lakluhna inkhawm hi Meghalaya High Court-a Acting Chief Justice, Justice Uma Nath Singh-a'n kaihruaiin, rinawmna thu a tiamtir.

Tripathi hi Meghalaya Governor 19-na a ni a, Governor Krishan Kant Paul thlak tura ruat niin, Paul hi Uttarakhand Governor atan ruat a ni. Uttarakhand Governor Aziz Qureshi chu tun hnai khan Mizoram Governor atan ruat a ni bawk.

Governor Tripathi chuan lakluhna inkhawm neih zawhah thuthar thehdarhtute hmaah thu sawiin, state pahnih Governor a nihna angin state politics-a inrawlh a tum loh thu a sawi a, Governor chu khawtlang mipui­te zahtlak an ni tur a ni, a ti.

Meghalaya leh West Bengal tana a hun hman dan tur sawiin Tripathi chuan hna a neih dan a zir a nih tur thu a sawi a, Meghalaya-a hnathawh tur a neih chuan a awm a ṭul tur thu a sawi.

State hmasawnna tura hna hrang hrang thawh mekte chu a ngaihpawimawh tur thu a sawi bawk a, infrastructure hmasawnna - inkalpawhna kawngpui, airport leh transportation chu a rang lama ngaihtuah ngai a tih thu a sawi bawk.

Governor ṭhenkhatte hmar­chhak biala an awm duh loh chungchangah Tripathi chuan hmarchhak bial chu hmun nuam tak a nih laiin, an awm duh lo chu mak a tih thu a sawi.