Meghalaya cabinet-in GHADC term a pawtsei

Meghalaya cabinet chuan Thawhlehni khan a vawi li-na atan Garo Hills Autonomous District Council (GHADC) term a pawtsei.

GHADC term hi thla ruk chhung pawhsei a ni a, kumin August 18 hian a tawp ang.

State sorkar chuan GHADC term pawtseiin inthlan a tikhawtlai a, hei hi India danpui, Sixth Schedule siamṭhat an beisei vang nia sawi a ni. GHADC inthlan hi nikuma neih tura ruahman tawh a ni.

Chief Minister Mukul Sangma chuan sorkar laipuiin Parliament budget session neih hunah Sixth Schedule hi siamṭhat a tum niin a sawi.

District Council Minister HDR Lyngdoh pawhin hemi chungchang hi sawiin, "Sorkar laipui chuan India danpuia Sixth Schedule siamṭhatna tur chu a buaipui mek a, budget session neih hunah a pu lut dawn a ni," a ti.

GHADC-ah hian member 29 an awm a, member 40-a tihpun tum a ni. GHADC seat tihpunna hi Achik National Volunteer Council (ANVC) helte'n sorkar laipui leh state sorkar remna thuthlung an ziahpuiah khan a tel a ni.

GHADC-a seat tihpun a nih chuan Khasi leh Jaintia Hills Autonomous District Councils (ADC)-ah pawh tihpun a nih rin a ni.

Hetihlai hian Chief Minister Mukul chuan GHADC seat tihpunna atana Sixth Schedule siamṭhatna tur chu a rang lama chinfel a nih theih nan state sorkarin a bawhzui tur thu a sawi bawk a, a hlawhtlin ngei theih nan Central-a political party dangte pawh biakrawn an tum thu a sawi bawk.