NPF MLA lungawi lote'n hruaitu atan Kaito an thlang

Nagaland Chief Minister TR Zeliang laka lungawi lo Nagaland People's Front (NPF) MLA te chuan Nilaini khan thuchhuah siamin, G Kaito Aye chu NPF Legislature Party leh DAN Legislature Party hruaitu atan an thlan thu an tarlang a, Nagaland Chief Minister thar atan lak thuai a ni ang, an ti.

NPF Legislature Party din thara thupuangtu Imkong L Imchen chuan thuchhuah a siamah House chuan TR Zeliang kaihhruainaah rinna a nghat tawh lo niin a sawi a, party lungrualna a chhiatbelh zel loh nan Chief Minister a nihna aṭanga bang turin a ngen bakah hmingchhiat theihna laka party humhim chu an thil ngaihpawimawh a ni, a ti.

"Mipuite rawngbawlsak turin Nagaland mipuite'n NPF-ah rinna neiin kan party an thlang tling a, hei vang hian mipuite duhdan leh democracy kalphunga a tam zawk duhdan a lal theih nan Chief Minister TR Zeliang hi a ban a ngai a ni," tiin Imchen thuchhuak chuan a tarlang.

BJP MLA te'n NPF an thlawp chu lawmawm a tih thu sawiin, BJP leh NPF chuan hun lo awm zel turah inlaichinna leh thawhhona ṭha an neih zel a beisei thu a sawi a, sorkar laipuia NDA sorkar pawhin Nagaland harsatna leh Naga peace talk chu a ngaipawimawh hle a ni, a ti.

NPF thupuangtu Imchen chuan MLA te'n Kaito Aye kaihhruaina an thlawp chu an pawmpui thu a tarlang bawk.

NPF president-in MLA lungawi lote party aṭanga a suspend chu thuneihna hman dik lohna a ni tiin, democracy kalphung palzutna a ni, a ti a, hetianga thutlukna siam hi party hmel tichhe thei a nih vangin a thutlukna chu sût nghal tura a phut thu a tarlang bawk.

Chief Minister TR Zeliang kaihhruainaa MLA lung­awilote chuan party MLA ṭhenkhat suspend an nih vang­a lungawi lohna lantir nan mawhphurhna leh chanvo hrang hrang an lak - Minister, Parliamentary Secretary, adviser leh chairman an nihna aṭanga inhnuhdawh an tum thu an tarlang tel a ni.

Hetihlai hian NPF MLA lungawilote hruaitu Kaito Aye chuan Nilaini vek khan an thawhpuite nen Governor P.B. Acharya an hmu nghal a, sorkar thar siam dan tur an sawipui.

Kaito hi Kuzholuzo Neinhu (Azo), CM Chang, Deo Nukhu, Dr. TM Lotha leh thupuangtu Imkong L Imchen te'n an ṭawiawm a ni.

Meeting-ah hian Kaito leh a hote chuan thlawptu MLA nei tlem zawk TR Zeliang-a kaihhruai sorkar chu ṭhiat turin Governor an ngen a, Chief Minister chu a rang lama inhnukdawk tura an duh thu Governor hnenah an thlen bawk.

Kaito leh a hote chuan a kaihhruaina hnuaiah sorkar ngelnghet tak din an tum thu Governor an hrilh bakah NDA sorkar nen pawh thawhhona ṭha an neih zel tur thu an sawi bawk.

Kaito pawlte chuan MLA pasarih party aṭanga suspend te chu security force te venhimna hnuaiah pawn chhuak thei loin Kohima-a Hotel Oriental Grand-ah dah an nih thu an tarlang bawk a, hei hi dan kalh a ni, an ti.

TR Zeliang-a thlawptu NPF pawhin MLA lung­awilote thuchhuak hi chhang­letin, sorkarna chu MLA lungawi lote ni loin 'official party' chauhin an siam theih thu an tarlang a, ṭangrual sorkar, DAN chu political party ṭangrual te'n an din thu leh MLA-a thlantlinte siamchawp a nih loh thu an tarlang tel bawk.

Zeliang pawlte chuan NPF legislature party hruaitu leh Chief Minister an neih lai chuan House-ah thutlukna siam tur a ni, an ti a, Chief Minister an rin tawk lohnaah chuan political party dang te'n House-ah “no confidence motion" an pu lut tur a ni, an ti. MLA lungawi lote zingah senior hruaitu tam tak awm laiin, dan mumal hre lo leh democracy kalphung mumal zawm loin an lungawi lohna an lantir a ni, tiin MLA lung­awi lote hmalakna chung­chang an tarlang bawk.

Zeliang-a pawlte chuan MLA lungawi lote chuan dan leh hrai pangngai takin hma an la tur a ni, an ti a, sorkar dinglai a awm avangin sorkar thar a pian loh tur thu an tarlang bawk.

Zeliang chuan an laka rinna nghattu mipuite tan sorkar ngelnghet tak siamsak chu an thil bat a ni tiin, chu chu an party thil ngaihpawimawh ber a ni, a ti.

"Mipuite rawngbawlna ngaipawimawh loa MLA mahni hmasial tak te'n party chhunga harsatna an thlen chu a vanduaithlak hle a, heng MLA te hian sorkar kallai tibuai turin mipuite chu hmathehah an hmang a ni," tiin Zeliang chuan a sawi.

Zeliang chuan NPF party hmingchhiatna ven nan theih­tawp chhuaha a ṭan tur thu leh MLA lungawi lote phutna avanga Chief Minister aṭanga inhnuhdawh a tum loh thu a sawi bawk.