Assam-a raltlan 7,000 chuang an chenna inah kir leh tawh

National Democratic Front of Boroland (Songbijit) helte pawikhawihna vanga tlanchhia Assam-a raltlan 7,000 chuang chu an chenna inah an kir leh tawh a, hetihlai hian mi nuai 1.2 chuang chu district pathuma relief camp-ah an la awm a ni.

Assam State Disaster Management Authority (ASDMA)-in thuchhuah a siamah Kokrajhar, Chirang leh Udalguri district-a relief camp 68-ah mi 1,22,725 an la awm thu a tarlang a, Sonitpur-a relief camp erawh Nilaini khan khar a ni, a ti.

Tun dinhmunah Kokrajhar district-a relief camp 53-ah mi nuai 1.02 an la awm a, Chirang district-a camp 11-ah mi 20,000 la awmin, Udalguri district-ah mi sang chuang an la awm bawk.

Kokrajhar district thuneitute chuan tun hnai khan Alipurduar, West Bengal-ah official te tirin, Adivasi mi 450 chuang an chenna inah an thawnkir leh tawh bawk.

ASDMA Chief Executive Officer Pramod Kumar Tiwari chuan raltlante thawnkir turin theihtawp chhuaha hma lak zel a ni, a ti.