Tripura voter gender ratio-in national average a khum

Tripura voter gender ratio chu India rampuma voter hmeichhia leh mipa zat chawhrual aiin a sang.

Tripura-ah hian mipa voter 1000 zelah hmeichhia 964 an awm a, hetihlai hian India rampum voter gender ratio ah chuan mipa 1000 zelah hmeichhia 640 chauh an awm a ni.

Politics lam zirbing mite chuan India rama left party rorelna state awmchhun Tripura-ah hian tualchhung inrelbawlnaah pawh mipui thlantlin hmeichhia pawh state dang aiin an tam zawk niin an sawi.

Chief Electoral Officer Ashutosh Jindal chuan kum 2004 Lok Sabha inthlanah Tripura voter gender ratio chu mipa 1000 zelah hmeichhia 933 an ni, a ti a, kum 2009-ah 954-ah pung chhoin, kum 2014-ah 963-ah a punbelh leh a ni, a ti.

Tun hnaia electoral roll thar tihchhuahah voter zinga hmeichhia leh mipa awm zat chawhrual hi mipa 1000 zelah hmeichhia 964-ah a punbelh leh a ni.

Electoral roll ennawnna thla thum chhung an neihah electoral roll thar ber hi tun hnai khan tihchhuah a ni a, Jan 1, 2015 aṭanga chhiarin Tripura-ah voter 2,422,764 ziahluh an ni a, heng zinga 1,189,138 hi hmeichhia an ni. Nikuma electoral roll an lo tihchhuah tawh aṭangin vote nei punna hi 1.62 % a ni.

CEO Jindal chuan kum 2013 state assembly inthlanah mipa aiin hmeichhe vote tla a tam thu a sawi a, mipa vote 1,156,476 a tlak laiin hmeichhe vote 1,198,970 a tla thung, a ti.

Political analyst Tapas Dey chuan tribal leh tribal lote zing­ah politics ngaihhlutna a pung nasa hle niin a sawi a, state dang political hruaitute ang lo takin Tripura-a hruaitute chuan politics thilah hmeichhiate tan zau takin kawng an hawng mek zel niin a sawi.

Panchayat Minister Manik Dey chuan Tripura chu gram panchayat, village council leh Tripura Tribal Areas Autonomous District Council election-ah hmeichhia te tana 50% seat hauhsaktu state awmchhun a ni, a ti a, nikum July thlaa panchayat election neihah hmei­chhia te'n 50% aia tam seat an lak thu a sawi bawk.

Hetihlai hian political analyst Tapas Dey chuan hmarchhak state pali- Manipur, Meghalaya, Mizoram leh Arunachal Pradesh-ah mipa voter aia hmeichhe voter an tam zawk thu sawiin, mahse state legislative assembly-a hmeichhe member thlantlin zat erawh an tlem thu a sawi.

"Hmarchhak state pasariha assembly seat 466-ah hmeichhe member 24 (5.15%) chauh an awm a ni," a ti.