KMSS in political party din dawn

Assam-a Krishak Mukti Sangram Samiti (KMSS) pawl chuan 2021 assembly inthlana chuh turin political party an din dawn tih an sawi a, an party hming  hian KMSS hotu, jail-a tang mek Akhil Gogoi-a'n a chhuah hunah a puang dawn a ni, an ti. Gogoi hi an party chief minister candidate a ni dawn tih an sawi nghal bawk. 

KMSS president Bhasco De Saikia chuan nimina press confe­rence a neihah political party an din tur thu hi a puang a ni. "Party thar din tur hian kan inbuatsaih tawh a, regional party a ni ang. Hnam hrang hrang, sakhaw hrang hrang zuitu leh ṭawng hrang hrang hmangte an kan awm dawn a ni," a ti. 

Sorkar laipuiin dan siam thar, Citizenship (Amendment) Act duh lohna a lantir avangin Akhil Gogoi hi nikum khan National Investigation Agency chuan manin, Guwahati Central Jail-ah a tang mek a ni. Gogoi hi October thlaah chhuah a nih an beisei thu sawiin, Saikia chuan an party thar hming pawh hi a chhuah hunah a puang dawn tih a sawi. 

Nakkuma state assembly neih tur atan Congress leh AIUDF chuan thawhdun an tum thu an lo sawi tawh a. All Assam Students’ Union (AASU) leh Asom Jatiyatabadi Yuba Chatra Parishad (AJYCP) pawhin inthlana chuh tur hian regional political party din an tum bawk.