Sorkarin thlawptu MLA a nei tam tawk: Nagaland CM

Nagaland Chief Minister T R Zeliang chuan an party MLA lungawi lote'n sorkar thar siam an tum chungchangah Ningani khan a kaihhruai DAN sorkar chuan NPF MLA leh an party tlawptu MLA a neih tam tawk thu a sawi.

Zeliang hian Nilaini khan NPF President Shurhozelie nen Govenor an lo hmu tawh bawk a, a kaihhruai sorkara thilthleng mekte a hriattir a ni.

"Nagaland sorkar dinhmun dik tak a hriatchian avangin Governor chungah ka lawm hle a ni," tiin NPF MLA lungawi lote thiltih chu anmahni thlangtlingtu mipuite zah lohna a ni, a ti.

"MLA ṭhenkhatte'n anmahni thlangtlingtu mipuite pawh zah loa hma an la hi a vanduaithlak hle a, he thil hi democracy kalphung palzutna a nih bakah state sorkar pawh hnathawk mumal thei loin an awm phah bawk a ni," a ti.

Chief Minister Zeliang chuan amah phiarrua paihthlak tumtu MLA te chuan member thlawptu tam zawk nei anga insawiin, media kaltlangin mipuite an bum a ni, a ti a, mipuite dawt thuthang laka inthiarfihlim turin a ngen bawk.

Nagaland Chief Minister Zeliang hian January 5 zan aṭang khan a laka lungawilo NPF MLA te dodalna a dawng a, MLA lungawi lote hian sorkar thar siam tumin an hruaitu atan Industries and Commerce Minister G Kaito Aye an thlan thu leh thlawptu MLA an neih tam zawk thu an tarlang a ni.

Rorellai MLA lungawi lo 11-te hian Ningani khan CM hnenah banna lehkha an thehlut tawh. Banna thehlutte hi minister pahnih, parliamentary secretary panga leh MLA pali an ni.