Nagaland-in cheng vbch 1087.75 la dawng lo

13th Finance Commission of India-in rawtna a lo siam tawh, financial year 2010-11 aṭanga 2014-15 chhunga Nagaland-in sum a hmuh tur cheng vaibelchhe 1087.75 chu a la dawng lo.

Nagaland sum hmuh tur hi financial year 2014-15-a budget-a sum indaihlohna vaibelchhe 1234 dawn a ni.

Head hrang hrang hnuai­a Nagaland sum hmuh tur hi ‘Local Bodies’ hnuaiah a tam ber a, he head hnuaiah hian Nagaland tan cheng vaibelchhe 428 ruahman a nih laiin vaibelchhe 72.45 chauh a dawng a ni. State Specific Needs hnuaiah vaibelchhe 250 ruahman a nih laiin financial year 2014-15 chhungin vaibelchhe 120 chauh a la dawng bawk a, vaibelchhe 130 pek loh a la awm a ni.

13th Finance Commission term hi March 31, 2015 hian a tawp dawn a, Nagaland sorkar chuan hemi hma hian sum hmu thei turin thil tihfel ngaite a chinfel a ngai a ni.

April 1, 2015 aṭangin 14th Finance Commission hun a inṭan dawn a, 14th FC hian Nagaland tan eng project te nge a pawmpui dawn tih hriat lawk a ni lo.

13th Finance Commission-in Nagaland tana rawtna a lo siam tawh kum 2010-11 aṭanga Nagaland-in sum a la hmuh loh te hi state sorkarin project hrang hrang kalpui meka Utilisation Certificate a thehluh theih loh avanga pekchhuah loh a ni a, hei vang hian state sorkarin Utilisation Certificate te hi a thehlut lo a nih chuan sum hi pekchhuah theih a ni lo.

13th Finance Commission chuan Nagaland-a project hrang hrang kalpui mekte endik turin Nodal Agency a ruat a, Nodal Agency te pawmpuinain state sorkar chuan Utilisation Certificate a siam a ngai a ni.