Assam thingpui huana hnathawkte tan thu lawmawm

Sorkar laipuiin Assam thingpui huana hnawthawkte tana man tlawm zawka ration a pek a tihtawpsak chu Gauhati High Court chuan a hnuhkirsak.

Justice AK Goswami kaihhruai High Court bench chuan Nilaini khan Assam Chah Mazdoor Sangha (ACMS)-in petition an theh­luh chu ngaihtuahin, thutlukna hi a siam a ni.

Court chuan hemi chung­changah hian January 21-ah hearing a ko leh dawn a ni.

Thingpui huana hna­thawk pawl, ACMS chuan ration tihtawpsak an nih chungchangah hian sorkar laipui, Assam sorkar, Assam Director of Food and Civil Supplies leh Food Corporation of India te chu court-a insawifiah turin an phut.

Assam Chief Minister Tarun Gogoi chuan court thutlukna chu lawm­awm a tih thu sawiin, Assam-a National Food Security Act kalpui a nih hma chuan state sorkarin thingpui huan­a hnathawkte ration chu tihtawpsak lo turin sorkar laipui a lo ngen tawh a ni, a ti.

Congress senior hotu, Union Minister hlui Paban Singh Ghatowar pawhin court thutlukna chu lawmawm a tih thu a sawi bawk.

Thingpui huana hna­thawkte tana man tlawm zawka ration pekna kalphung hi Assam chuan kum 60 chuang a lo kalpui tawh a ni.