Tripura MLA 3-in Covid-19 an kai tawh
Tripura-a Bharatiya Janata Party (BJP) MLA, Mimi Majumder chu Inrinni khan Covid-19 a kai tih hmuh chhuah a ni a, state chhunga MLA pathumah he hri hi an kai tawh a ni.
MLA Mimi Majumbder chuan a twitter-ah Covid-19 a kai thu hi puangin, doctor-te thurawn angin a pasal nen damdawi-inah in enkawl tura a luh thu a sawi. Hri a kai vangin tun hnaivaia amah nena inhnaihna lo neite chu inkhung hrang a, test nei ve turin a ngen nghal bawk.
BJP MLA Ramapada Jamatia chu July 22 khan hri a kai tih hriat a lo ni tawh a, August 1-ah IPFT MLA Dhananjoy Tripura chuan a kai tih hriat leh a ni. Tripura-ah hian Covid-19 kai hmuh chhuah tawh hi mi 8,717 awmin, an zinga 72 in an thihpui tawh. Sample 2,41,101 test a ni tawh a, test aṭang positive hmuh chhuah hi 2.52% a ni a, recovery rate 73.85% a tling tawh bawk.