Tripura assembly session open space-ah neih tum

Tripura Legislative Assem­bly moon session, September chawlhkar thum­na aṭanga neih tur chu in chhungah ni loin, open space-ah neih tum a ni. Hemi atan hian law and parliamentary minister Ratan lal Nath chuan Inrinni khan Agartala-a Heritage Park gallery pawh a enfiah tawh a ni. 

Minister chuan ram chhung hripui leng avang­in state ṭhenkhat pawhin assembly session hi  assembly building pawn lamah an nei tih a sawi a, state sorkar pawhin pawn lama neih dan tur hi a ngaih­tuah mek a ni, a ti. 

Ni nga awh tur budget session pawh  hri leng vang hian ni hnihah tihtawi a lo ti ni tawh a, budget pass a nih hnuah session hi tihtawp a ni. Law minister chuan dan angin thla ruk chhungin session hi neih leh tur a nih vangin sorkar chuan hri leng laka himna tur ngaihtuahin, open space-ah session neih dan tur hi a buaipui mek a ni, a ti. Heritage park chu session neihna atan hian a hman chi dawn em tih a enfiah thu a sawi a, thutawp erawh chu siam a la ni lo tih a sawi. 

Tripura assembly-a hian seat 60 awmin, rorellai BJP in MLA 36 leh IPFT in member pariat an nei a, eptu party CPIM-in member 16 an nei.