Nagaland MLA pahnih suspend leh an ni

Nagaland-a rorellai Naga People’s Front (NPF) kaihhruai DAN-III sorkara MLA pahnih chu party aṭanga suspend leh an ni.

MLA pahnih suspend zingah hian pakhat chu cabinet minister a ni a, G Kaito Aye-a kaihhruai MLA lungawi lote zing a mi an ni.

NPF president Shurhozelie Liezietsu chuan Party Central Office-a thuthar thehdarhtute a kawmnaah PHE Minister Noke Wangnao leh MLA Imkong L Imchen te chu party kalphung kalha an chet avangin party aṭanga suspend an nih thu a sawi.

Party aṭanga hnawhchhuah MLA pahnihte hi party danpui palzutin Chief Minister TR Zeliang-a lakah an hel a, G Kaito Aye-a kaihhruaina hnuaia sorkar thar din tumte zingah an tel a ni.

NPF chuan heng mi pahnihte nen hian party aṭangin minister pathum, parliamentary secretary panga leh MLA pakhat a suspend tawh a ni.

NPF president Liezietsu chuan party aṭanga MLA an hnawh­chhuahte hi party-a primary leh active membership an nihna aṭangin a suspend a, thudang a awm hma chuan political/legislature party forum-ah vote thlak theihna chanvo an nei lo ang, a ti a, mahse legislative assembly-a floor-ah chuan vote an nei thung ang.

Chief Minister Zeliang kaih­hruaia PHE Minister Noke chuan January 7 khan minister a nihna aṭangin banna a thehlut a, MLA lungawilo Kaito Aye-a pawlte a zawm nghal a ni.

Hetihlai hian Chief Minister Zeliang chuan Governor PB Acharya chu biain rorellai sorkar fiah a nih theih nan assembly special session ko turin a ngen a ni.

Chief Minister Zeliang, NPF president Liezietsu leh NPF secretary general KG Kenye te chuan kar kalta Zirtawpni tlai khan Raj Bhavan-ah Governor Acharya an hmu a, NPF MLA lungawi lote'n sorkar thar din tuma hma an lak dan chung­changte an sawipui a ni.

Zeliang chuan, "House-a thlawptu ka nei tam tawk tih ka hria a, hei vang hian assembly-ah vote of confidence neih ka duh a ni," tiin Governor a hrilh.

Kaito Aye-a kaihhruai MLA lungawi lote pawhin sorkar thar siam an tum chungchangah kar kalta khan Governor hmuin, sorkar thar siam an tum thu an hriattir tawh bawk a ni. Mahse Governor chuan hemi chung­changah hian a ngaihdan leh a thutlukna a la puangzar lo thung.