Tripura-ah MGNREGA sum tihchingpenna hailan a ni

South Tripura district court chuan Inrinni khan Sabroom district, Satchand block, Rural Development department-a technical assistant chu MGNREGA sum cheng nuai 6.47 chingpen chung­changah ni thum chhung judicial custody-a awm turin a chungthu a relsak.

Block Development Officer (BDO) Goutam Choudhury-a'n sum chingpen chungchanga FIR a thehluh hnuah technical assistant, Arjun chu man a ni a, financial year liam taa MGNREGA fund cheng 6,47,345 eirua puh a ni.

Special audit neih a nih ṭumin Arjun chuan pawisa hi a mimal leh a nupui Ruby Srivastava-i bank account-ah a lo dah vek tih hmuhchhuah a ni.

Sum chingpen chung­chang hi Tripura-a eptu party, Congress leh BJP-in a chhui hnuah hai lan niin, BDO Choudhury-a'n FIR a thehlut nghal a ni.

Rural Development Minister Naresh Jamatia chuan sum chingpen kaihhnawiha FIR thehluh hriat a nih hnuah audit report chu an endik thu sawiin, bawhzui turin district magistrate hnena an thawn thu a sawi a, court thuchhuak angin Arjun leh a nupui bank account chu khawih chet theih loha dah nghal a ni, a ti.

Hetihlai hian Congress chuan Gomuti district-a Rupaicherri RD Block-ah MGNREGA fund cheng vaibelchhe 14.39 chu kum hnih kalta khan tihchingpen a nih thu leh Unokoti district-a Pacherthal RD Block-ah cheng vaibelchhe 76.79 chu audit report-a a lan danin tihchingpen a ni, an ti a, mahse rorellai sorkar chuan hei hi a bawhzui lo, an ti.

West Tripura, Bishalgarh district-a MGNREGA fund cheng vaibelchhe 50 tihchingpen chungchangah rinhlelh 10 te chu man an lo ni tawh bawk a, an zing­ah hian Tripura Civil Service (TCS) officer pakhat leh CPI-M youth wing hruaitu Chief Bimal Chakraborty-a nau pawh a tel a, an thubuai ngaihtuah mek a ni.