Arunachal-in helho laka beihpui thlaknaah Assam a zawm
Arunachal Pradesh chuan Assam-in Army leh police ṭangrual hmanga Arunachal ramria National Democratic Front of Bodoland (Songbijit) hel ho laka beihpui a thlak chu a zawm.
Arunachal Pradesh DGP S Nithianandam chuan he thu hi sawiin, Arunachal aṭanga NDFB (Songbijit) helte umchhuak turin theihtawp chhuahin Army leh Assam Police te kan thawhpui dawn a ni, a ti.
Arunachal IGP (law and order) I D Shukla pawhin helho laka beihpui thlakna tichak turin kar kalta khan Assam ramria pawikhawih hluarna hmun ṭhenkhat a lo tlawh tawh bawk a, helho laka beihpui thlaknaah hruaitu a ni.
Shukla pawlte hian Papum Pare district leh Assam , Lakhimpur district inri-na, Boguli, Deka, Kakoi leh Borsetum reserve forest-ah chak takin helho dapchhuah hna an thawk mek a ni.
Hetihlai hian Arunachal Pradesh police te chuan Tirap, Changlang leh Longding district-a helte beih dan tur ruahmanna thar siamin, police station 11 hawnbelh an tum bakah police station pakua awmsate thuamṭhat an tum bawk.
Assistant Inspector General of Police (AIGP) Tussar Taba chuan district pathuma police post ruak 1769 chu hnawhkhah a nih tawh thu a sawi bawk a, police hmanraw tihchangtlun nan lirthei chi hrang hrang 50 lei a nih tawh bakah biakhlatna hmanrua eng maw zat lei a nih tawh thu a sawi bawk.
AIGP Taba chuan kum 2014 khan district pathum police te hman atan 5.56 INSAS rifle 313, 9mm pistol 158, two inch mortar 40, 7.62 LMG 33, AK-47 silai mu nuai hnih chuang lei a nih thu leh night vision device 28, video camera 20 leh digital camera 23 lei a nih thu a sawi bawk.