Congress-in Assam-ah rally huaihawt

Assam Pradesh Cong­ress Committee (APCC) chuan sorkar laipuia BJP sorkar chu mipuite hnena a thutiama ding loah puhin, mipuite phat­sanah a puh a, hemi avanga lung­awi lohna lantir nan kar kalta Inrinni khan Guwahati-ah kawng an zawh.

Chief Minister Tarun Gogoi chuan pungkhawm mipui hmaah thu sawiin, hlawhtling taka kawng an zawh thei chu kum 2016 assembly inthlan lo awm tura Congress party hnehna chan tur lantirtu a ni, a ti a, kawng zawh an huaihawt chuan in Congress mi leh sate hnenah inrintawkna a neih thar tir leh a ni, a ti. "A changin thli tlehṭhin mah se Congress chuan thli tleh tawn tlang turin thiltihtheihna a nei a ni," a ti.

"Khawvela eng thil mahin Congress an tichhe thei lo a, British rorelna pawhin a tichhe zo lo a ni. BJP hian Congress an tichhe thei tih an inring tak zet em?" tiin Gogoi chuan a sawi.

"Bangladesh nena land swap deal kan ziah dawnah Congress chu ram phatsantuah min puh a, mahse tunah hian tu nge ram phatsantu zawk chu? BJP chuan Lok Sabha inthlanpui neih dawna an thutiamte kha an thlak­thleng vek tawh a ni," a ti.

Gogoi chuan sorkar laipuia BJP kaihhruai sorkar chu sawisel chhunzawm zelin, "Sorkar laipuia sorkar thar chuan a hnuaiah sorkar hna lak a titawp tawh a, mahse keini chuan ṭhalaite hnenah hna kan siamsak ang, chu chu BJP nena kan danglamna a ni. BJP chu sumdawng mi hausa te hamṭhatna chauh ngaihtuahtu an ni," tiin a sawi.

Gogoi chuan sorkar laipuia UPA sorkar laiin India ramah retheihna a tlak hniam thu leh literacy rate a san thu a sawi bawk a, hei hian nasa takin mipuite dinhmun a chawi sang a ni, a ti a, mahse NDA sorkar thar chuan mipuite hmasawnna scheme tam tak a titawp tawh a ni, a ti.

APCC president Anjan Dutta pawhin Congress party worker te chu party-a an lungawi vek thu leh party chhungah inphiarrukna engmah a awm loh thu a sawi bawk a, kum 2016 assembly inthlanah BJP laka phuba lak ngei an tum thu a sawi bawk.

Dutta chuan India rama tuialhthei man tlahniam zelah BJP sorkar chuan a hmingṭhatna an lak theih loh thu sawiin, tuialhthei man chu khawvel puma tla hniam a ni, a ti a, mahse khawvel puma tuialhthei man 55%-a a tlak hniam laiin India ramah chuan petrol liter khat man cheng 61 a la ni reng a, international market price a tlakhniam lai hian petrol chu litre khat cheng 33-a hralh tur a ni, a ti.

"Eng vangin petrol man a la to reng? nikum November thla aṭang­in excise tax vawi thum an tipung tawh a, oil company te'n a hlawkna a tel mek a ni," a ti.

AICC general secretary (Assam in-charge) CP Joshi pawhin rally-ah hian thu sawiin, "Prime Minister Narendra Modi chuan thil tum inthup a nei a, chu chu parliamentary democracy kalhing tih­chhiat a ni. Modi chuan Pandit Nehru thil hnuhchhiahte chu thai bo vek a tum a, mahse an thil tumah hian an hlawhchham dawn a ni," a ti.