Rahul Gandhi hian Assam tuilian tuarte a tlawh lo - Hazarika: Congress Party-in Hazarika thusawi an chhang let

Assam-a BJP kaihhruai sorkara water resource minister Pijush Hazarika chuan Congress party hruaitu, Rahul Gandhi-a'n Thawhṭannia tuilian tuarte tana siam, chhawmdawlna-in a tlawh nia tarlan chu thudik tawk lo a ni tih a sawi.

Pijush Hazarika hian Rahul Gandhi-a'n khawi chhawmdawlna-in mah a tlawh lo tih sawiin tuilian thlenna hmuna kal ang a an sawi pawh thudik tawk lo a ni tih X lamah a tarlang. Hazarika chuan thuthar thehdarhtute chu an thuchhuah ṭhin thlifim hmasa tura a duh thu sawiin, WhatsApp-a thu inthawn kual leh social media-a thu an dawnte belchiang hmasa loa chhuah lo turin a chah a ni.

Hazarika hian hetiang hian sawi mah se, Rahul Gandhi hian Thawhṭanni khan Fulertal, Cachar district-a tuilian tuarte chhawmdawlna-in a tlawh ngei a, mipuite harsatna chu a hriatthiam thu leh an aiawha Parliament a ṭhu a nih angin an tana hmalak a tum thu a sawi. Tuilian tuar mek, Assam ṭanpuina tur chu a rang thei anga pe turin sorkar laipui pawh a ngen bawk.

Assam Congress chuan Hazarika thusawi hi chhang letin, Rahul Gandhi in a tlawh leh tlawh loh chungchanga buai loin BJP sorkar hmalak ṭhat loh vanga an buainate chu ngaihtuah zawk tura an duh thu an sawi. Assam Congress chuan tuilian danna 50 chuang tih chhiat a ni te, kum nga chhunga sorkar laipuiin tuilian laka invenna tur sum a pek ṭhat loh chhan leh tuilian chungchanga union home minister Amit Shah ṭawngkam te chu sawi fiah turin Hazarika chu an phut a ni. Congress hian prime minister Narendra Modi chu Assam, Manipur leh hmarchhak ngaihsak loah puhin cricket team hmu tura hun a neih laiin Assam leh Manipur tlawh tur erawh chuan hun a nei lo tih an sawi. State leh central-a BJP sorkar in kum tina tuilian vanga an harsatna tawh ṭhin tireh tura an hmalak dan an zawt bawk a ni.