Manipur : Kuki Inpi in darkar 12 awh bandh an huaihawt

Kuki Inpi Manipur (KIM) chuan Kuki-Zo village volunteer pathum security force-ten an man avanga an lungawi lohna lantir nan state chhunga Kuki-Zo hnamte chen tamna laiah nimin khan darkar 12 awh bandh an huaihawt.

KIM chuan bandh an huaihawt chhan chu an chunga rorelna dik lo tak thleng an duh loh vang a ni tih an sawi. Kuki-Zo hnam pawl hrang hrangte chu an thuchhuak zawm turin an ngen a, an mite chunga rorelna dik lo tak thleng chu lungrual taka hmachhawnpuiah Kuki-Zo pawl dangte chu an sawm a ni. An mipuiten rahbeh leh tihduhdah an tuarna chu beih letpui turin pawl dangte chu an sawm a, hemi bakah hian Legislature keng tel Union Territory an sual chhuah ngei theih nan ṭanrual a pawimawh tih an tarlang bawk.

Kuki-Zo village volunteer pathumte hi Thawhlehni zinga CRPF, Assam Rifles leh state police ṭangrualin Kangpokpi district-a L. Hengjol khua aṭanga an mante an ni. Manipur police chuan an mi mante hi helpawlah puhin National Investigation Agency (NIA) kutah an hlan. Kuki-Zo hnamte chu lungawi loin mi tang chhuah phutin Kangpokpi Superintendent of Police office kawtah pung khawm a ni.

Committee on Tribal Unity (CoTU) leh L Hengjol khaw mite chuan police mi man pathumte hi helpawl ni loin village volunteer an nih thu sawiin CoTU hian mi tangte chu chhuah zalen an phut tih an tarlang ve bawk. Security force-ten Thawhlehni zinga L. Hengjol khuaah helpawl nen an inkap nia an sawi chu CoTU chuan an chhanglet a, security force-te chu L. Hengjol khaw beitu zawk an nih thu leh bungraw tam tak an tihchhiat bakah khaw chhung hmeichhiate an hliam nual tih an tarlang.