LAC hrulah Frontier Highway siam a ni dawn - Kiren Rijiju

Union minister Kiren Rijiju chuan Line of Actual Control (LAC) hrula kal turin Frontier Highway siam a ni dawn tih a puang. Rijiju chuan he hmalakna hi a hlawhtlin hunah chuan Indo-China ramri venhimna tikhauh thei hmalakna a ni dawn niin a sawi.

Frontier Highway siam nan hian Rs vbc 40,000 ruahman niin Rijiju chuan ram laksak turte hnenah an phu ang tawk zangnadawmna pek a tiam a, he hmasawnna hnathawhin a nghawng tur mipuite thil hlauhthawn chu a rawn sawi fiah nghal a ni. Frontier Highway hi ramri aṭanga km 20 a hlaah siam niin LAC leh border dang hrulah a kal dawn a, km 1,500 a thui ni tura ruahman a ni. Hemi bakah hian a chhehvela inkalpawhna tiṭha turin km 1,000 kawngpui dang siam tura ruahman a ni bawk.

Arunachal state chhung khaw hrang hrang paltlang tura duan niin pawl hrang hrang thawhhona hnuaia siam tur a ni a, hetah hian Border Roads Organisation (BRO) leh Ministry of Road Transport and Highways (MoRTH) te pawh an tel dawn a ni. MoRTH hian ram lak tur leh pawmpuina lehkha ngaite chu March 2025 hmaa tihfel hman an tum a, hnathawh hi March 2027 hmaa zawh an tum a ni. He project hi China ramri hrula kal tur a nih avangin India ram venhim nana hmalakna pawimawh tak a ni a, hemi bakah hian a chhehvela awmte tan hmasawnna a thlen beisei a ni bawk.