Meghalaya : Zirlaite pui turin zirlaibuah QR code dah dawn

Meghalaya sorkar chuan zirlai kum thar aṭangin zirlaite pui turin zirlaibuah QR code an dah tel dawn. He QR code hmang hian zirlaite chuan an zirlai kaihhnawiha pawimawh dang an hriat theih phah dawn a ni.

National People’s Party (NPP) hruaitu leh Meghalaya cabinet minister ni bawk, Rakkam A Sangma chuan an hmalakna thar tur hi puangin zirlaibu zawng zawngah QR code hi dah vek a ni dawn tih a sawi. Hemi hmang hian zirlai naupangte chuan an zirlai atana ṭangkai tur thil dang an hre thei dawn a ni. Sangma chuan QR code chu scan a nih chuan application pakhatah lutin chutah chuan zirlai hrilhfiahna video a lo awm dawn a ni, a ti.

Rakkam A Sangma chuan an hmalakna hi state chhung zirlaiten an chhawr ṭangkai ngei a beisei tih sawiin thingtlang lam, tuition leh thildang harsatna hmuna awmte tan a ṭangkai lehzual ngei a beisei tih a sawi. Syllabus mil zelin zirlai hrilhfiahna video hi dah a ni dawn a, hemi bakah hian QR code hmang hian UPSC, IIT leh JEE exam zawhna chhannate dah tel an tum tih a sawi bawk. NPP chuan an hmalakna tur chuan zirlaite tan hamṭhatna a thlen ngei an beisei tih an tarlang ve bawk.