Sorkar laipuiin hel inpete lakah kalphung a thlak

Sorkar laipui chuan hmarchhak biala helpawl, sorkar kuta inpete laka kalphung thlak danglam tumin, khauh zawka kal a tum a, hemi atan hian police leh security force te chu inkahhai thuthlunga ground rules te khauh zawka lekkawh turin a hriattir.

Ministry of Home Affairs (MHA) official chuan hemi chungchang hi sawiin, sorkar kuta hel inpete chu duhsak an nih tawh loh tur thu leh an thubuai court-a ngaih­tuahsak an nih tawh tur thu a sawi. Hel inpe duhten hamṭhatna an dawn tur pawh police leh security force te'n helho dapchhuah beihpui an thlak huna kahhlum loh a ni dawn a ni.

MHA official chuan sorkar kalphung thar hian hel inpete avanga security force leh police te'n hmingṭhatna lak an tum ṭhin chu a tihtawp a beisei thu a sawi a, hamṭhatna duh vanga hel pawla inhnamhnawihna nei lote sorkar kuta inpe awm ṭhin chu a tihtawp a beisei thu a sawi bawk.

Sorkar laipui chuan inkahhai thuthlung an ziahpui tawh hel pawlte lakah pawh khauh zawk­a kal tumin, inbiak­na hmanga an harsatna chinfelsak a tum bawk. Sorkar chuan inbiakna neih duh helpawlte chu inbiakna neihpuia an harsatna chinfel thuai a tum a, hemi rual hian thubuai nei helte chu ngaihhnathiam a tum lo bawk. Helpawl hruaitu thubuai neite pawh court-ah an thubuai ngaihtuah a ni tawh ang.

Inkahhai thutlung ziak tawh helte'n pawl ṭhenkhat an pui ṭhin nia sawi chungchangah MHA chuan police leh security force te chu khauh zawka ground rules lekkawh turin a hriat­tir bawk a, camp an siam­sak pawna silai leh ral­thuam an chelek a nih chuan hel pangngai anga en tur an ni bawk ang.

Sorkar laipui chuan mi pawisawi lo tam tak thihnaa inhnamhnawih National Democratic Front of Boroland (NDFB- Songbijit) helpawlte chu inbiakna neihpui a tum loh thu a tarlang bawk.