Ramsa venhim nan Assam-in Army ṭanpuina dil dawn

Kaziranga National Park-a samak pel ṭhin te zingah hel ho an inhnamhnawih ṭhin nia sawi chung­changah Assam sorkar chuan national park-a Forest Department-in patrolling a neihnaa telpui turin Army ṭanpuina ngen a tum.

State Forest and Environment Minister Rakibul Hussain tun hnaia samak pahnih kahhlum an nih chungchangah Principal Chief Conservator of Forests (Wildlife), Assam chu meeting neihpuiin he thutlukna hi an siam a ni.

Kaziranga National Park-ah kumin chhungin sa pel ru ṭhinte'n samak pathum an kap­hlum tawh a, hei bakah hian Orang hmunah pakhat kahhlum a ni tawh bawk.

Kaziranga Park-ah hian kum 2013 leh 2014 chhung khan sa pel ru ṭhinte an hluar hle a, venhimna pawh khauh zawka kalpui ni mah se sa pel ṭhinte lakah ramsate an him lo hle.

Forest department official chuan sa pel ṭhin zingah Kar­bi Anglong-a helpawlte an inhnamhnawih vangin tun hnai­ah samak te dinhmun a him lo nasa zual niin a sawi.

"Forest department official te chu hel pawlte bei tura ralthuama ṭhaa thuam an nih loh vangin Park chhunga samak te'n an tawrh phah hle a, hel pawlte dolet thei tura venhimna kalpui a nih loh chuan samak te an him reng a rinawm loh," tiin official chuan a sawi.

Forest department official chuan, sa pel ṭhinte enthla tur leh thuhretu an awm loh avangin Kaziranga Park-ah venhimna a chak theih loh thu a sawi bawk a, sa pel ṭhinte chanchin hrilh hmasatu chu awm se chuan ramsate an venhim theih a rinthu a sawi.

Hetihlai hian kumin chhunga samak pali kahhlum an nih vanga lungawi lohna lantirin All Assam Students Union (AASU) chua Pathianni khan Kaziranga National Park-ah nawrh an huaihawt. AASU adviser Samujjal Bhattacharya chuan samak venghim turin Army dah an phut tih a sawi a ni.

Assam sorkar chuan samak venghim turin tun hnaiah ṭum eng emaw zat venhimna khauh zawkin a lo kalpui tawh a, Kaziranga National Park-ah hian kum 1967 aṭangin security staff mi 49 a dah ṭan tawh a, security staff te hi kum 2001 khan mi 562 an tling tawh a ni. Security staff bakah hian Assam Forest protection Force (AFPF) te chu kum 2013 aṭangin venhimna pe tura dah an ni bawk a, Wildlife (Protection) Act, 1972 hnuaia sa pel ru ṭhinte hremna chu na zawkin a thlak danglam bawk.