Meghalaya-ah Mission Organic tlangzarh a ni

Meghalaya Chief Minister Mukul Sangma chuan kar kalta Zirtawpni khan South West Garo Hills district-a state sorkar flagship programme, Integrated Basin Development & Livelihood Promotion Programme (IBDLP) hnuaia 'Clean and Green Mission' chung­changa ni khat awh sawihona inkhawmah Mission Organic a tlangzarh.

Sawihona inkhawmah hian “Promising an organic revolution for transformation of Meghalaya” tih chu thupuia hman a ni. Horticulture, Agriculture leh C&RD department leh FDS Mission Organic ṭangrualin organic farming lama loneitute hnena zirtirna pekna atana an buatsaih a ni.

Chief Minister Mukul chuan thuchah sawi­in, department hrang hrang te'n rua­hmanna mumal an neih loh avanga harsatna an tawh dan te tarlangin, thlai chin theihna ram tih­chhiat a nih dan te leh chemical fertiliser hman tam luat avanga lei tichhiat a nih dan te a tarlang a, hetiang thil vanga 'Clean and Green Mission' kalpui tum a nih thu a sawi.

"Kan hmalakna turah mipui leh loneitute an tel ve loh chuan cheng vaibelchhe tam tak pawh seng mah ila a thlawn dawn a ni. Hei vang hian department hrang hrangte'n thawhhona ṭha an neih piah lamah mumal takin mipuite leh loneitute an thawhpui a ngai a ni," a ti.

Chief Minister chuan Punjab state, Bathinda hmuna thlai chinna atana chemical fertiliser an hman tam luat avanga cancer natna hluar ta chungchang sawiin, Horticulture department chu loneitute leh department palaite Bathinda hmuna tira, chemical fertiliser hman tam a ṭhat loh zia an mita hmu turin a ngen bawk.

Meghalaya Chief Minister chuan Mission Organic programme chu district zawng zawnga khaw tinah kalpui a nih tur thu sawiin, organic veka thlai tharchhuak hmasa khaw 100 chu special scheme buatsaihsak an nih tur thu a sawi a, South West Garo Hills chu organic district hmasa ber ni tura bei turin a ngen bawk.

Mukul chuan state chhunga tui harsatna sutkian nan cheng vaibelchhe 4500 hu project kalpui tuma hma an lak thu sawi bawk a, IBDLP chu tui an hnianghnar theihna atana kalpui an ni tih a sawi bawk. Loneitute'n eizawnna ngelnghet leh rintlak an neih theih nan Horticulture department chu mau chinna tur programme ruahman turin a hriattir bawk.