Meghalaya HC-in Police hnalak CBI chhuitir turin hriattir

Meghalaya High Court chuan Ningani khan Home (Police) department hnuaia Meghalaya Police Service Officer hna lak chungchang thubuai chu CBI chhuitir turin thupek a chhuah.

Meghalaya Police Service Officer atan hian mi 34 lak an ni a, he mi chungchngah hian he hna diltu zinga mi Millon Ch Momin chuan Court-ah thubuai thlenin, Court chuan ngun taka a ngaihtuah hnuah thupek hi Justice SR Sen chuan a chhuah ta a ni. Momin hian physical efficiency test, preliminary written examination leh mains written examination a paltlang a, Momin hi personal Interview nei turin December 15, 2014 khan koh a ni a, nimahsela tling zingah hian a hming a lang ve lo. MPSC chuan Meghalaya Police Service Officer atana tling mi 34 te hming hi a tarchhuak tawh. Thubui ziak luttu Millon Ch Momin hian a hnuah a vaiin mark 874 a hmu tih hriat a ni a, tling zinga mi pali te aiin a mark hmuh hi a sang zawk a ni.

High Court-in Viva-voce score sheet a endik lehnaah chuan Millon Ch Momin viva-voce score sheet-ah hian thil fel lo a awm nia hriat a nih bakah mark pek danah thil dik lo a awm nia hriat a ni. Score sheet-ah hian Personality, Capacity Command and Confidence, Intelligence, General Knowledge leh Special Knowledge-ah te mark pekna siam a ni a, nimahsela Millon Ch Momin score sheet-ah hian hetianga mark mumal taka pek hi a awm lo a ni. Meghalaya Public Service Commision chairperson Biana W. Momin leh chief controller of examination MPSC W.A.M. Booth te chu Court hmaah inlanin, viva-voce score sheet chungchanga Court zawhna chu a chhanna mumal tak an nei lo nia hriat a ni bawk. Superintendent of Police In-Charge, CBI, N.G. Khamrang chu Court hmaa inlan tur hian koh a ni bawk.

He thubuai hi CBI chhuitir turin Meghalaya High Court chuan thupek a chhuah tawh a, CBI report hi thla thum chhunga peih tura tih a ni. Justice Sen chuan, "CBI hian document pawimawh te a lakhawm anga, a ṭul dan angin hma an la dawn a, report hi thla thum chhung peih hman tura tih a ni" a ti.