Manipur-ah 'climate change' ven nan scheme 17 kalpui dawn

Manipur sorkar chuan climate change venna atan mission thar a kalpui dawn a, he mi atan hian scheme hrang hrang duan a ni. Directorate of Environment-in a tarlan dan chuan mi zawng zawng tel theihna tur scheme 17 zet kalpui a ni ang.

Scheme kalpui tur zingah hian Eco-Development Programme, Environment Education Programme, Environment Monitoring Cell, Solid Waste Management, Environmental Information Dissemination leh Multi – Disciplinary Scientific Study of Catchment Area of Major River Basins te chu a lian zual an ni. Directorate of Environment official chuan, kan chenna leilung a lo dang lam zel avangin heng scheme te hi kalpui turin ruahmanna hi siam a nih thu tarlangin, sik leh sa danglam chak lutuk ven nan hian awmze nei zawka ramngaw leh nungcha te humhalh turin hmalak a ni dawn a ni a ti. Hmalakna pakhat atan Imphal East-a Mayangkhang-ah Eco-Park leh Seloi Eco-park te siam tumin hma lak mek a ni. Environment Monitoring, Research and Development Laboratory te chu thuam ṭhat tura tih a ni a, hei bakah hian kum 2010-a din tawh Geographical Information System (GIS) Lab chu thuam ṭhat tura tih a ni bawk. Heng bakah hian National Adaptation Programme for Climate Change on Model Carbon Positive Eco-Village leh UNDP & Global Environment Facilities Project on Renewable energy and energy efficiency te chu kalpui tura ruahman a ni bawk.