AP-ah CBSE result chhiat vangin Principal leh Headmaster suspend

Tun hnaia Central Board of School Education exam result tih chhuah chuan Arunachal Pradesh-ah nghawng la nei zelin, Education Department chuan he mi kaihhnawihah hian sorkar enkawl school-a principal leh headmaster pakhat ve ve te chu a suspend.

Education Minister Wanglin Lowangdong chuan May 28-a CBSE class-X leh XII exams result chhuak-ah khan an state chu a hmingchhe hle tih sawiin, chhui chian a nih tur thu a lo sawi tawh. Education department chuan press release siamin, Government Hr Sec School, Bilat (East Siang) aṭanga zirlai class-X exam 108 zingah pahnih chauh an pass tih sawiin, hetianga result chhia hi tunhma lamin a la awm ngai lo a ni an ti. Siang district-a Government school Riga aṭanga class-X exam 28 te chu an fail vek bawk a ni. Kumin-a CBSE class-X leh XII exams result chhuak-ah hian class-X-ah 58% pass in, XII-ah 46% chauh an pass a ni.

June 14, khan Education Minister kaihhruainain CBSE result thlirletna hun hman a ni a, parliamentary secretary (Education) Tsering Tashi, secretary (Education) Bidol Tayeng, director of secondary education, B N Lendo, director of elementary education T Gao leh SCERT director G Lazi te an tel a ni. Education Minister chuan result tih chhuah takah hian lungawi a har kan tikhawp mai, hetianga result chhia hi kan la tawng ngai lo a ni a ti. Sorkar school enkawl zinga 0% leh 2% pass percentage awm hian nasa taka zirna lamah hmalak a ngaihzia a tilang chiang hle a ni a ti. CBSE exam-ah hian result ṭha zawk neih a nih theih nan Secretary (Education) chu hma la nghal turin kan ngen a ni a ti. Naupangte hmakhua ngaiin theih tawp chhuah turin kan thawk dawn a ni a ti.