Voluntary Blood Donation-ah Tripura sang ber

A zawna a kum riatna atan Tripura chu India ram zinga thisen pe hnem ber a ni leh ta.

Thawhlehni khan Agartala-ah World Blood Donor Day hman a ni a, he huna thu sawitu Tripura Health Minister Badal Choudhury chuan, "Kum 2015-16 chhunga thisen mamawh zat aṭanga 97% chu a thlawna pek a ni" a ti. Minister chuan thisen pek chu mi hrisel pangngai tan a hlauhawm lo tih sawiin, midang te tana kan tih theih sang ber a ni a ti. National Aids Control Organisation (NACO) a tarlan danin, state paruk – Tripura, Tamil Nadu, Arunachal Pradesh, Maharashtra, Madhya Pradesh leh Haryana te chu a thlawna thisen 95% pe tling awm chhun an ni. Thisen a thlawna pekah hian national average chu 70% a ni. Chief Minister Manik Sarkar chuan amah ngei pawhin thisen vawi ruk a pek tawh thu sawi ve bawkin, an state-ah mi 29,000 kum kalta chhung khan thisen a thlawnin an pe tih a sawi. Sarkar chuan tunah hian Tripura Blood Transfusion Council chuan kum kal mek chhung hian thisen unit 35,000 pek tumin hma a la mek a ni a ti bawk. 2004 aṭang khan kum tin Nobel Laureate American scientist Karl Landsteiner piancham pualin World Blood Donor Day hi hman ṭhin a ni.