HM Rajnath-a'n helho biak a tum lo

Union Home Minister Rajnath Singh chuan Thawhṭanni khan Guwahati-a 9th National Youth Festival, 2015 kharna inkhawmah thu sawiin, sorkar laipuiin hel pawlte inbiakna neihpui a tum loh thu a sawi.

Singh chuan India ram khawi hmun pawha tharum thawhna thleng chu hmarchhak bialah pawh ni se pawmzam thei a nih loh thu sawiin, "India ram chuan hun khirh tak a tawng mek a, mahse he hun paltlang tur hian theihna leh chakna kan nei a ni. Khawvela ṭhalai tamna ber kan ni a, hei vang hian India ram chu khawvela ram ropui leh thiltithei taka siam theihna kan nei a ni," a ti.

Union Home Minister chuan sorkar laipuiin hmarchhak bial chu a ngaihpawimawh thu leh, Guwahati-a youth fest neihte leh all-India DGP conference neihte chu a bul ṭanna a nih thu a sawi.

"Hmarchhak bial chu India ram state dangte lak aṭangin a hranga awm angin an sawi ṭhin a, mahse keini tan chuan Jammu & Kashmir hi India lallukhum a nih angin hmarchhak bial chu kan kut chak tak ang a ni," a ti.

Assam leh Guwahati chu hmar­chhak bial thlunzawmtu kawng­pui pawimawh tak a ni, tiin Singh chuan a sawi bawk.

India ram ṭhalaite laka ruihhlo hluar lutuk chu a ngaihmawh thu a sawi bawk a, mi tlawm­ngaite chu an ṭhiante leh an chhehvelah ruihhlo hman ṭhatlohna thu a tam thei ang bera thehdarh turin a ngen bawk.

National Youth Festival, 2015 kharna inkhawmah hian Union Minister of State (Independent) for Sports and Youth Affairs Sarbananda Sonowal, Assam Chief Minister Tarun Gogoi leh Union Minister of State for Information and Broadcasting Rajyavardhan Singh Rathore te pawh an tel a ni.