AP BJP-in pre-paid meter sawifiah turin a phut
Arunachal Pradesh BJP chuan Itanagar-a pre-paid electric meter vuah mek chu mipuite'n thil hriat thiam loh an neih avangin sawifiah turin state sorkar an phut.
Arunachal BJP thupuangtu, RK Khrimey chuan, state sorkar chu pre-paid meter vuahtu company te hnena contract an pekchhuah dan kimchang tarlang tur leh Itanagar-a pre-paid meter vuahna atana sum sen tur zatte tarlang tura an phut thu a sawi.
Technology thar hman tur chu BJP-in a dodal loh thu tarlangin Khrimey chuan pre-paid electric meter vuah a nih chhan chu state sum ei raltu, power pawt ru ṭhinte ven nan tih a ni a, mahse tun hnaiah power man to avanga mipui lungawi lohna hriat tur a awm bawk si lo a state sokarin hmanhmawh taka thutlukna a siam chu mak an tih thu a tarlang.
"State sorkarin power kal ral ṭhin tihtlem a tum tak zet a nih chuan Governor, Chief Minister, Minister, MLA leh top official te chenna inah a enchhin nan pre-paid electric meter chu vuah hmasa se, mipuite pawhin rinhlelh an nei lo zawk ang," tiin state BJP thupuangtu chuan a sawi bawk.
Khrimey chuan pre-paid meter vuah mek chu titawp lailawk tura state sorkar an phut thu sawiin, BJP chuan hemi chungchanga inrawlh turin Governor ngen an tum thu a sawi bawk.
State Power department chuan pre-paid meter project hi cheng vaibelchhe 85 sengin, nikum November 10 aṭangin Itanagar-ah a ṭan a ni. Tun thlengin meter 600 chuang vuah a ni tawh a, power department chuan March thlaah meter 3,000 vuah hman tumin hma a la mek.