Tripura BJP-ah TPGC inchhunglut

Tripura-a Congress party aṭanga chhuak te'n April, 2013-a an din, Tripura Pragatishil Gramin Congress (TPGC) chu Bharatiya Janata Party (BJP)-ah a inchhunglut.

Tripura state BJP president Sudhindra Dasgupta chuan he thu hi sawiin, TPGC president Subal Bhowmik leh party worker 6,000 chuang chu tun hnai khan BJP-a lawmluh an ni, a ti.

Congress MLA hlui, Subal Bhowmik chuan rorellai, Left Front sorkar laka beihpui thlak nan TPGC hi a din a ni.

TPGC memeber te BJP-a lawmluhna inkhawm neihah hian Tripura assembly-a Janata Dal MLA pakhat leh Congress hruaitu Arun Kanti Bhowmik bakah IAS officer hlui Bijoy Debbarma te pawh lawmluh tel an ni bawk.

State BJP president Dasgupta chuan tun hnaiah party dang hruaitu leh party worker tam takin BJP an zawm thu sawiin, hun lo awm turah mi tam zawkin BJP an zawm a beisei thu a sawi bawk.

BJP hruaitu Ramlalji pawhin thu sawiin, tluang taka an kal zel a nih chuan kum 2018 assembly inthlan­ah Left Front sorkar chu BJP-in a paihthlak theih a beisei thu a sawi.