Independent MLA 7-in CM Zeliang an thlawp

Nagaland-a independent MLA pariat zinga pasarih chuan thuchhuah inṭawm siamin, Chief Minister TR Zeliang an thlawp thu an tarlang.

Thuchhuah chuan TR Zeliang-a kaihhruai DAN-III sorkar chu an lo thlawp tawh thu leh an thlawp zel tur thu a tarlang a, Zeliang-a thlawpin ṭanrual an tum thu te, mipuite hmasawnna atan a kaihhruai sorkar chu thlawp zel an tum thu te sawi.

Naga People's Front (NPF) MLA lungawi lo pawla thupuangtu, Imkong L Imchen-a'n January 11, tualchhung chanchinbua independent MLA pariatte ṭan hmun chiang lo taka a tarlan hnuah independent MLA pasarihte hian thuchhuah inṭawm an siam a ni.

Independent MLA pasarihte hi - Levi Rengma, Jacob Zhimomi, YM Yollow, Picto Shohe, Toyang Chang, S Chuba leh Amenba Yaden te an ni.

Hetihlai hian NPF president Shurhozelie Liezietsu-a'n NPF buaina chu party chhunga buaina ringawt ni loin DAN sor­kar buaina a ni, tia media mite hmaa a lo sawi tawh chungchangah BJP unit Nagaland chuan DAN Legislature Party chauh chu an hruaitu thlang­chhuak thei dinhmuna ding an ni, a ti a, hei vang hian Chief Minister chu DAN Legislature Party member te'n an hruaitu tur an thlanchhuah theih nan legislature party meeting ko tura an duh thu an tarlang.

State BJP unit chuan tuna politics thila Nagaland buainaah NPF chu a mawhphurtu a ni, tiin Governor-in President rule a puang a nih chuan NPF chu mipuite hmaa insawifiah tur an ni, a ti.