Sorkar laipuiin JACAS inbiakna a neihpui dawn

Assam-a 6th scheduled autonomous hill districts pahnih aṭanga state hran siam phutna chungchangah sorkar laipui chuan Joint Action Committee for Autonomous State (JACAS) chu January 19 hian inbiakna a neihpui leh dawn.

Inbiakna hi New Delhi-a neih tur a ni a, JACAS leh sorkar laipui aiawhte bakah Assam sorkar aiawh, official te pawh an tel bawk ang.

Assam sorkar aiawhin principal secretary AK Singh leh additional director general of police Pallab Bhattacharyya te an tel ang a, JACAS aiawhin chief convener Bijoy Teron, Advisor John Engti Kathar, Chairman Khor Sing Teron, founder member Bidya Teron bakah zirlai leh ṭhalai pawl hruaitute an tel ang.

Ministry of Home Affairs-a deputy secretary Ajay Kanaujia-a'n sorkar laipui ai a awh bawk ang.

Kum 2013-a sorkar laipuiin Andhra Pradesh aṭanga Telangana state thar siam a nih tur thu a puan hnuah Assam, Karbi Anglong district-ah state thar siam phutin, mipuite'n August aṭanga September, 2013 chhung khan nawrh an huaihawt a, mi tam takin nunna an chan bakah vantlang bungrua vaibelchhe eng emaw zat hu tihchhiat a ni bawk. Zirlai leh ṭhalai pawl hruaitute'n an thil phut nawr nan ṭang­rual pawl, JACAS an din a, September 2, 2013 khan sorkar laipui leh Assam sorkar nen inbiakna an ṭan.